يا واش يا واش

روحي بترف..
تشف، تهف..
سمعت دقة ..
قلب الفراش..

و سمعت صخرة ..
بتقول في حفرة..
اوعوا تنسونا ..
و ما تدوسوناش..

و مطرة محبوسة..
في سحابة خضرة..
بتقول لقطرة ..
من مدة ما نزلناش..

نقرت نقرة..
فتحت كسرة..
و نادت اخواتها..
نزلوا طشاش..

سمعت الذرات.
جوه السحابة..
بتحمد و تشكر..
و هي بتتلاش..

حسيت بعصفور..
دمعه مقهور..
وليفه راح..
يسعى و لا جاش..

دق في ضلوعي..
قلب القمر..
سقعان عشان..
الاحبة بتتحاش..

شفت المحبة..
بتبكي الاحبة..
و احلى صحبة..
و هي بتنعاش..

طرت في الكون..
بحب و جنون..
احب كل حاجة..
و لو ما بحبهاش..

حتى التعبان و الحية..
و الرعدة المعدية..
و السم و السماوية..
و العالم الاوباش..

الدنيا لحن ملون..
و عليه احنا نقسم..
و نرضى بالمقسم..
و قلوبنا ما نقفلهاش..

سمعت كمان الريح..
بتصفر للمجاريح..
تاخذ منهم جراحهم..
و تغطيهم برياش..

سمعت التراب بيضحك..
و صوته بجد مضحك..
بيقول انا .. ليكم مدفن..
و انا .. زرعي المعاش..

سمعت المية بتنادي..
للحبيب و اللي بيعادي..
بتقول اهو كله بيجري..
و آخره يصبح بلاش..

حبيت العالم بحاله..
و صبحت ا نا مرتاحاله..
الدنيا صاحبها الله..
و كله فيها برحاله..

و لما كله مروح..
فليه فيها بنجرح ..
وليه جدا بنفرح..
ليه نقطع و ندبح..
و ليه ننتش ونرمح..

باقول رأيي يادنيا..
يا جماعة..
ياواش ياواش