و الله في الكورة ..
مصر منورة..
فرحانة و منصورة..
و هي مكورة..
و يا ريت مجبورة..
في اي حاجة تانية..
في الكورة بس..
و الباقي مسخرة...
الكورة بقت الحشو ..
و هي برضه الوش..
ماعادش في مصر ..
ماعادش..
حاجة ما بتتغش..
غير اللعبة دي..
عشان اللي بيلعب..
لا يمكن و ما يقدرش ..
يقدر ياخد مكانه ..
واحد ما بيلعبش
لا بالواسطة..
و لا بالغش..
الحاجة الحقيقية الواحدة..
في سلطنة ..
ملوك الهبش ..
اه يا ام الشعور ..
من عصر خوفو ..
بدور..
تغوي كل اهلك..
العاقل و المطيور..
يستنوا هنا ..
في ارضك..
حتى لو هي بور..
يبنوا اساسك..
تهده البحور..
يبنوها تاني..
و يشموا البخور..
تتهد تاني..
من تقل الجور..
نرفعها تاني ..
بالقلب الجسور..
شعب المحبة..
جبان آه حبة..
بس معذور.,.
و اهه دلوقتي..
ماعادش يفتي..
و له مقدور..
غير على الكورة..
اللي بتدور ..
بعقله المسحور..
عليه العوض..
شعبك مرض..
و مرضه هصور..
فرح الشعب..
بس في اللعب..
و غير كده..
كله مكسور..
عليه العوض..
عليه العوض
Subscribe to:
Post Comments (Atom)
No comments:
Post a Comment