شحات و واقف ..على دي النواصي\
اطاطي قلبي قبل ما يوطى راسى\
اطلب رزقي من غلبي ويأسي\
من قلوب الحجر ..اقل منها قاسي\
"بتشحت ليه يا واد.. ليه ما تشتغلش..\
مانت سليم اهه.. و جتة و زي الجحش..\
عيال صيع حرامية.. ماليين كل الشوارع \
حرام علينا يا بيه .. لو نديهم قرش"\
كلامهم بيدبح ..و يقطع ويجرح\
البيه ساعته ديه ..تساويلها مطرح\
الست دي دهبها.. يأكل مداين\
و كلهم مستخسر .. حتى يسمع و اشرح
اشتغلت عند واحد ..اجرتي اكلها\
رحت مطرح تاني ..ايده جرت شكلها\
رحت عند واحدة.. رمت على بلاها\
اروح فين يا ناس ..قولولي حتة اجلها
لموني من الشوارع ..و انا اقول امين\
عاملوني مرة واحدة ..زي البني ادمين\
دانا وحيد يا عالم ..و يتيم وحالتي غلب\
و افطر و اقول يا ربي حاتعشى منين؟؟
Subscribe to:
Post Comments (Atom)
No comments:
Post a Comment