رجع العيد

32
رجع العيد تاني تاني ..و خبط بابي عليا
لقاني قاعدة وحدي .. فارشة الارض حواليا
صورك كثير كثير ..ملونة و شقية
الوان بلا الوان من جوه عيونك جاية

باهت صبح فرحنا في الصور دي و بعيد
كأنك انت ما كنتش ولا يوم واحد سعيد
كأني ما شفتك ابدا..و لا شفت معاك العيد
كأننا حفرية.. غريبه ..تحت الجليد

ما تلومشي عليا لو انسى .. تعبت من كل ذكرى
و زي قزاز قديم.. صبحت مرايتي عكرة
ما بقاش فيا احتمال.. لا لمحبة ولا فكرة
و صبحنا..انت و انا مساءو مالوهش بكرة

سنين و ايام ممسوحة.. عدت عليك يا غالي
صحيح باحاول اقلب الحزن على الليالي
لكن اوقات الاقي ضحكك فيي ودني عالي
و ساعنها يهون على لو يتحرق خيالي

كل الاعياد اشوفك داخل عليا فرحك
كل ولادنا ما تكبر.. اسمعك و انت بتضحك
كل عيد يعدي .. افتكر لعبك و مرحك
كل فرحة تجيني .. حزنها فيها يتمحك

كنت وردة حلوة و الحلو مالوش مكان
كنت ضحكة عالية ..ترن حب و امان
كنت حاجات كثير.. ليا و للزمان
بعدك ..والحمدلله .. صورتي بلا الوان
صورتي بلا الوان .

رجع العيد و رجع ..و انت ما رجعت
يا ريتك كنت حلم و عمري فيه ماتمتعت
ياريتني كنت جنبك لحد ما اكون شبعت
حد يشبع من المحبة ..اهوانا عمري ما سمعت!!

اهو كلام و قول و مغنى ..بيبرد الحريق
يبكي بدالي شوية .. يشيل ثقل الطريق
الناس بتخسر اب او اخ او ابن واحد
وانا خسرتهم كلهم.. و فوقهم الصديق

الحمدلله