سأل ابني الصغير
باباه اللي في سفر
قال له جبت لي لعبة
يا بابا زي الصور ؟؟
صورة كل الولاد
في القصص و علي الجلاد
باباهم بيجيب حاجات
و انا مستني الميعاد
بأعد مع عد ساعتنا
وانت ما جيتش في بيتنا
زعلان مني يا بابا
و لا احنا في ايه غلطنا ؟؟؟
كل العيال لهم بابا و بابي
وانا بس وسط اصحابي
قاعد في العيد وحيد
رغم أن حواليا احبابي
ماما و تيتي و خالو
جابولي كتير و شالوا
بس انا مستنيك انت
و انت بالعالم بحاله
يا بابا نفسي اشوفك ساعة
و اوريك اللي علي الشماعة
و كراساتي و كتبي و شرابي
جديدة كلها لماعة
قالوا لي بابا مسافر
هو سفرك ده له آخر
ولا هم بيكذبوا عليا
و سايبني اهاتي و اعافر
صورتك معايا جميلة
متعلقة في وسط الصالة
شايلني انا و اخويا
و ماما باينة خيالة
يا ريتنا نرجع ليومها
بتضحك و انت بتبوسها
و ماما من يومها بتحاول
بس ضحكتها ساكنها عبوسها
ليه سيبتني و سيبتها
ليه بعتني و بعتها
ليه نلاقي الراحة يوم
لما كله حينتهي؟
حتقول نصيب يا بني و صار
حقولك وانت ايه صرصار
داس عليك عيل حمار
ولا انت اب بار ؟؟؟
كيف و كيف اصبح انا وحيد
عملت ايه عشان اخسر العيد
و ليه كله في حاله عايش
وانا بابكي ولو سعيد
مش تخلي بالك يا بابا
و انت عارف وراك غلابة
و ناس عليك بانية امالها
و انك غالي علي الترابه
اه يابا اه يابا
من زمان شاكك في قولهم
و ازاي تهرب مني عيونهم
لما تيجي سيرتك
و يوروني صورتك
كأن كابوس و جالهم
يعني مافيش امل و لاحيلة
ترجع و تكمل العيلة
بابا حلم و راح خلاص
عمره ما يعود بين الناس
كأن عمره ماعاش في ليله
غصب عنه مش بخاطره
فات و خده في ميعاده قطره
كان بوده يكون معاك
بس ده برضه
مش اخرك و اخره
و مسير حضنه راح يساعك
و يمسك ايدك و يسند دراعك
و العمر حلم و يعدي في ثانية
و ربك رحمته فوق شراعك
خلاص سؤالي لقيت له جواب
ليه انا مختلف بين الصحاب
ليه ابويا غايب سلوه الغياب
و ليه ما جاب لعبة و جاب
يا رب يا عالم بالحال
تعوض عليا و تصبح عال
و بدل الاب اديني اخوال
و بدل اللعبة راحة البال
و حياة اللي حكمت ينشال
تجمعني بيه في و لو في خيال
تجعلني اعرف شكله
و اجاوب علي السؤال
و تديني هدية يا ربي
ما تتاقلش بمال
ما تتاقلش بمال!!!!
No comments:
Post a Comment