ليلك و امها

18


تمت النهارده خلاص ..
سنه ..
اتناشر شهر..
ليلك بنت السفر..
و بنت بلاد القهر..
امها من بلد الضياع
و ابوها كذاب و فشر!!

و العجب العجاب يا ناس..
البداية حب و حماس ..
و القصة هي هي تمام..
من اول الساس للراس..

لكن برضه يا سادة ..
النصيب لازم ينداس..
و الخطوة اتخطت خلاص..
ومافيش منها خلاص.....


بنت الغربة و الترحال..
ارضها دم فيهارمال..
ابوها ما عرف يصون النعمة ..
و امها حمالة الاحمال ..

بس ده مكتوب عل الامهات..
تعيش و تموت تدي الحاجات..
تعيش ما تسمع غير يلا هات..
سوا الاب عايش او حتى مات...

بقوللك بجميلة تعيشي و تتعبي ..
و دي رسالة كل ام ، حبيب أو نبي..
ربنا كتب علي الطيبين العذاب ..
و في الاخر انت حتكسبي...


خبطة ورا خبطة ..
يا عقلي يا محزون..
ياللي عليك ..
من الهموم مخزون ..
و لو كان الحزن يوم ينباع..
كان زمانا.. اصحاب مليون..
و لا كام بليون..


بس قد الحزن قد الفرح و زاد..
عطانا اللي بيعطي الطيبين ..
و الاوغاد..
سعادة ومحبة ولو عمرهم قصير..
و من دي المحبة كمان ادانا ولاد ..

العمر مش رحلة ..
عشان فيها نرتاح
العمر ده اختبار ..
و مجاهدة للارواح..
العمر رحلة ..
اخرها تعود بجراح ..
و من غير رحمة ربك..
انسى انك ترتاح...


الاجابة كانت و لسه مازالت ..
ان الجبال من الحقيقة دي زالت..
و بقي قلب ابن ادم لوحده يحاول ..
يعيش و يخرج من الاختبار ده فالت..


يحاول ويناور و يغلط و يصلح ..
ياكل بقشطة و ياكل مملح..
يعدي يوم ابيض..
و يوم وشه كالح..
و يرجع يقول غلطت ..
و يا رب انت تسامح..
و يرجو ..
و يأمل ..
و يدعو ..
انه يعدي و يفلح


القصد ان ايامنا ..
كده هي و حالها ..
و هوني عليكي ..
و اضمني في جيبك مآلها..
ما في ندل ..
الا يسدد كل غلطة
مافي ظلم ..
الا اخره اسوأ محطة..
ما في خير ..
الا صاحب الجاه حطه..
و عيالنا ..و احنا ..و كله علي الله
و احنا مالينا .. قوة و لا سلطة

بس كله بيعدي..
والخير انشالله في السكة..
و نقعد سوا نفتكر ..
الايام المرة السكة..
و نقول يا سلام عدت ..
الحمدلله علي دي الشكة..
خدنا ثوابها ..
و المهم .. ناخد الحب و البركة
وفعلا المهم ..
نطلع بالحب و البركة