25
كلمة بقك مش حتكفي
و لا قصايدك
بطولها توفي
تخفف المي
و ندمي و اسفي
كلمة بقك مش حتغير
مش حتخفف...
مش حتنور
ليلة بردي
مش حتدفي
كلمة بقك راكبة الخيبة
وجعت قلبي بصورة عجيبة
ماشية سخيفة
غبية غريبة
متغطية بحب و طيبة
و نابها ازرق زي الديبة
كلمة بقك جرحت كفي
كلمة منك
طرحت حسرة
قست قلبي
نست روحي
حلاوة بكرة
ابعد عني ..
بكل العكرة
وفر كذبك
لقعدة سكرة
مش محتاجة
ولا واقعة في نقرة
لازمني فيها ..ازود قرفي
كلمة بسيطة مالهاش لازمة
بتطلع منك حزمة
في حزمة
و لا بيهمك تعمل ازمة
كل العالم عندك جزمة
ابعد عني
اسحب غنمك
روح سرحها
في عزبة اهلك
روح غرقها
في وحل مصفي
روح اضحك بها
علي واحد مخفي
يستحملها
و يقبل ظلمك
كلمة بقك قتلت حبي
كلمة بقك ساعدت قلبي
يغلب ضعفي
ساعدت عقلي انه يفضك
يعرف .. يفهم
قسوة غدرك
و النهاردة اخيراباضحك
كلمة بقك بسمها.. تشفي
كلمة بقك جت لي في صفي !!!!
Subscribe to:
Post Comments (Atom)
No comments:
Post a Comment