هاري بوتر و الجاموس المصري

17
يا واد انت يا هاري ..
يخرب بيتك يا واد ...
ساحر و ازاي مداري ..
يا خيبة علولاد..
طلع لي يا واد جنيه..
او اعملي شاليه..
فولدمورت وحق ايه..
هو انت اهبل يا واد ؟؟؟

فين كده الاستعباط..
و اكل مال الاموات..
ما تيجي هنا تبات..
تتعلم الحلنجات....
و ترتاح من الجهاد؟

و شفلك كده بنيه..
كلها رقة وحنية..
يكون اسمها فوزية...
تجبلك الولاد....

اسمع يا واد يا هاري...
تعال اسحر لجاري..
او صلح في المجاري..
و اكسب كده مصاري..
و بلاها يا واد عناد.....

حتفضل عمرك تهاتي ..
و مع الشر العاتي ..
ياتخسر ياض حياتك..
يا تخسرني حياتي..
و نبقى يا واد سماد....

و حتي لو قتلته..
هنا امه و اخته ..
و اهله و كل عيلته..
حتنسي ازاي تحاول..
و تصلح البلاد....

يا هاري دانا بانصحك..
للبعبع يلمحك..
في مصر حنبطحك ..
تصلح ايه يا واد..


تعمل لي راجل.. هناك في الغرب..
اما لو جيت هنا .. بالضرب..
حتنسي ايه العدل و الحرب ..
و سحرك كله يبقي في النصب..
و نهب العباد....

يا هاري انت ..يا بن جون ..
الحق هنا غريب ..مجنون
ماله يا حسرة.. لا خال و لا عم
مالوش هنا غير السجون..
فيها تنقاد...

و انت طبعا واد انجليزي..
و هناك الشجاعة دى حاجة ايزي..
اما لو تيجي حدانا هنا..
حتتحول قوام وتبقي كريزي....
زي الجواد....

و تنسي افكارك الهبلة..
و تدور و تغني بطبلة
و تقول ..
و انا مالي عزيزي !!
يا حسرة ياولاد...


و لا سحر ينفع و لا شجاعة..
الحق مكانه في البلاعة..
و العدل فين؟؟؟على الشماعة..
و تشتغل صييت كده في الاذاعة..
تحكي عن ابوزيد و الزيبق..
لحد ما تموت من دي اللكاعة....



يا هاري اه واه و اه..
يا بلدي .يانا ..يا ولداه..
يا ناسي يا يتامي في بيت لئام..
في حجر اللي يبيع باباه..
و يبيع جدود...

لا في هاري و لا حتى رون..
و هرميون بتبيع معجون..
في شركة اصحابها حرامية..
و تبقبض يادوب بالبون..
من الاسياد....




و فولدمورت ده هنا عبيط..
يادوب يغش في وزن سميط ..
هنا عندنا ..حيعلموه ..
ايه يعني تسرق محيط؟؟
ايه يعني تعمل فساد؟؟

ايه يعني ترمل ستات..
ايه يعني داسوك البهوات؟؟
ايه يعني كام راجل مات ؟؟؟
دي سيرة مالهاش تنعاد...

دا عادي و عادي وا عادي ..
عل الحق تدور وتنادي..
و تلقى نفسك لوحدك..
تلقى عمرك رماد....

فولدمورت ده بيخرف ..
و فاكر نفسه شاطر و يعرف ..
بس لو هو واحد مقرف..
زيه هنا جراد جراد .....



بلادي عاوزة واحد شحرور..
يشبه كده لدمبلدور..
وحاوي و رغاوي و تقاوي ..
و كله حسب الميعاد....

مش عاوزة فعل خطير..
ولا تسيب السرير..
و ايش تعمل الماشطة ..يا هاري..
في ناس مالهاش ضمير؟؟؟

ماعدش فيها نور..
و لا واحد دمبلدور ..
كلهم اخد علي الجور..
و المشي جنب الحيط..
كأنهم جماد....



ما تاخدني معاك يا هاري..
في بلاد مليانة نور..
بس شوية نور..
في الظلمة يمكن تنقاد....

حاقول ايه بس يا هاري ..
دي بلدي مهما انكاد ..
و اهلي و لو اوغاد ..
و ناسي و لو ابعاد..
برضه لا يمكن ابدا...
اختار غيرهم اجداد...



ادعيلنا طيب يا واد ..
بتعويذة او اسياد..
ربنا يزيح من علينا..
وتطلع شمس في عينينا..
و يجي ولو واحد هاري ..
او حتي حد شاري ..
يطفي نارك وناري ..
و لو في لعبة اتاري..
يلعبوها الولاد...

نتكلم عن الاماني ..
و ترجع احلامنا تاني ..
و نحكي عن بطل زيك ..
يضحي و مش اناني..
شجاع و صاحب جهاد....


صغير بس كبير ..
بسيط لكن امير..
يفرح اهل الحواري..
و الظلمة لهم الهاري..
و يغوروا بقى البعاد......