مصر و الموت

يعشش في قلبك الموت..
و تزيد خيوط العنكبوت..
و تيجي هفة من نفسك..
تخلي موتك يموت..
يا مصر ولادك في التابوت..
قاموا و حطموا الطاغوت..
بنفحة واحدة من حبك..
طردوا البقة والبرغوت..
فما تزعليش يا مصر..
انتي لا يمكن تموت

عل الاصل دور!

مصر ايه غير شعبها و ناسها؟؟؟

و اللي في حياته و موته حبها و باسها؟؟؟

و اللي شرب من مرها و كاسها؟؟

و اللي انضرب من عساكرها و عسسها؟؟



مصر مش ابدا عساكرها و عسسها

مصر دي حبيبة اللي في شقاه حرسها

مصر الكريمة من راسها و لساسها

مصر الحضارة كتابها ..كراسها



مصر مش ابدا اللي اسرها و داسها

و لا هي اللي في الجهل دفسها

و لا هي اللي تنام و تسهى

دي مصر المعرفة ام الدنيا

و راسها



مصر يا ولاد

ربنا حرسها

و لعن حابسها

و الخير لابسها

و الحب خلاصها



مصر يا ولاد

شالت رئيسها

مين مصر؟؟؟

لما فكرت مصر مين؟؟ خاوتنا بمصر ليه؟؟ ما تسيبونا نسرقها منكم، ما كانت معانا بقالها سنين...؟؟؟

مصر كل واحد و معاه كل واحدة.. من غير الخناق و من غير المناهدة.. وقفوا في الميدان و جابولنا دي الوحدة ...و ساعة المحك ماتوا دول اخوات ..
مصر اللي ماتوا سالي و كريم ... مصر نوارة و بلال و ابراهيم... مصر البرادعي و نجيب العظيم ...مصر الحياة مش حياة الموات..
مصر اللواء البطران في سجنه.. و اللي استشهد و مصر في حضنه ..و ما رضي يهرب بسلاحه و جبنه.. و الراجل الحي حتى بعد الممات..
مصر امي في ساعة الفجرية ..و امك و هي بتعمل صحن الملوخية ..و امه و خالته و ريحة التقلية ..مصر الحلوة ام الحلوات ..
مصر ابوك الشقيان ده طول عمره.. و اللي عاش عشان تخلف اوامره ..و اللي اداك كل امله وعمره ..و لسه بيدي و لا يقولش هات..
مصر الموظف الغلبان في شغله ..واللي بيدبق و يحربق لأهله.. و اللي الدروس خربت بيت اهله.. و لا ارتشى و لا استغات..

مصر المسلم و هو المسيحي ..و الجريح فيهم ابني و جريحي ..تربتهم هنافي قلبي و فريحي ..و دمهم واحد عسل و شربات ..
مصر جيشها اهه في الشوارع ..يحمي اللي رايح و يشيل اللي راجع.. يستحمل عشانا تقيل المواجع ..و مافيش شكاوى لا اهات..

الشحات اللي واقف في كل الشوارع ..بيشحت و ينصب و ياكل كوارع.. و ساعة الوقفة الجد بيسارع ..و يقف و يهلل في دي المظاهرات ..
الفلاح واقف في ارضه.. يزرعلنا و يحمي عرضه ..و يشقى و يسد قرضه ..مش هربان بالمليارات..
و صاحب دكان صغير يشتري يدبق يغير يفتح بيوت صبيانه و يديهم العيديات..
الظابظ سهران في قسمه .. و ما هان حد في جسمه.. و بيحترم دينه و اسمه ..و لا انتهك عرض البنات.
العسكري الغلبان في يومه.. غرقان عرق جوه هدومه ...بيخدم فينا و مالوش في يومه ..غير شايه و شوية فتات ..
الشغالة راكبة الترام ..و بتتبهدل جوه الزحام ..و بس عاوزة الاحترام.. مش عوج من الستات...
السواق صاحي الفجرية ..يبتدي في النوبتجية ..خارج و الخير ده النية ..متوكل و لو عل البلاط..
الطبيب راح الميدان ..و اتعور و مات كمان..و هو بيخفف ع العيان ..مش بيقلب عيانه اللي مات..
هي دي مصر يا سادة.. هي دي مصر الولادة ..هي دي مصر السعادة..مش مقبرة المومياوات......

راس السنة السودة

في راس السنة الناس تفرح و تهيص..
و فيكي الانجاس بتجرح
و البرئ في العيد يفيص..
يا كفرة يا فجرة
يا ولاد الافاعي..
بلا علم و لا دين
و لا سبب و داعي..
ربنا وصانا
على سابع جار..
لكن البعيد
و اللي قاله يعمل كده حمار..
يقتل جيرانه و حبايبه و ناسه ..
بدل ما يوجه سلاحه
للي ليه عنده تار..
اه يا بلد جاهلة بنفسها ..
يا شايلة في ايدها نحسها..
يا ولادها نجسة بجهلها ..
يا نار حتاكل اهلها ..
لكن مافيش احساس..
و منين
اجيب ناس؟؟؟.. ..

الملح

ايدين الخلق مملحة..

تماثيل عاجزة و ممسرحة..

مافي وراها مصلحة..

قالك جحا..

تحت الرحا..

حتنجرش و تتمرش

و بعدها حتنمحى...



الملح طرح من العجز المزمن..

و من كتر اللسان ما بيحسبن..

و من كفر الامكان بالممكن

و البشر المدمن..

و هو مؤمن..

ده حتى التحى..



يا خالق الايدين بتعرف تخلق..

يا بارئ العينين ..و مصرف المطلق..

ليه البشر.. من الحق تتعلق؟؟

و يا تكذب يا تسرق يا تتنحى؟؟

ليه الحق صعب يورق؟

و الدنيا ليه كده مجحفة؟؟؟

صديقي

صديقي يرى تحت قدميه فوهة نيران تبتلعه..
و يرى سماؤه رياحا و سموما تقتلعه..
و في روحه معان تؤذيه و توجعه..
صديقي معذب مذبذب و الحزن يترعرع معه..
صديقي كل امان الدنيا لا يقنعه و لا يشبعه..
...صديقي اعتاد الهم حتى صار غيابه يفزعه..
و لا انا قوي فأمنعه و لا استطيع فأتبعه..
عجبا

الالفة...

الالفة دي احساس عجيب..
ما بتتعاش مع كل حبيب..
و لا بتجيش لا بالفلوس
و لا بالعافية و لا بالطيب..
لما حضنه - الله - ده هو بيتك..
و معاه.. هو حلمك و ريتك..
و انت نايم تمد ايديك..
تدور عليه و هو يغيتك..
عمره يوم ما يصد قلبك..
و لا بقسوة و طناش يدبك..
و في كل نظرة بيقول يحبك..
تغمض روحك و هو جنبك..
و لما يمشي ..تحتار و تمشي..
في الدنيا ساهي
خايف و رعبك ..
راسملك دواهي..
الالفة غالية ..
و بتروح في ثانية..
فلو عندك ..
شيلها في عبك..
نصيحة مني ..
الدنيا حتديك
يومين حلوين
و في الآخر تلبك ..
الالفة دي ايوه نعمة ..
بس لو ضاعت بتبقى عيب...
احساس رهيب..
موت الحبيب..
عجبي